BAGUIO CITY – Naikkaten manipud iti Public Order and Safety Division (POSD) ti enforcer daytoy a nangiruar ti igam iti napasamak a panagsinnungbat iti nagbaetan dagiti enforces ti POSD iti maysa a driver ti parapubliko a jeep sadiay Magsaysay Avenue, Slaughter Compound, Baguio City itay laeng nabiit.

Iti interview ti Bombo Radyo Baguio, dinakamat ni POSD Deputy Chief Daryl Kim Longid nga idi pay napalabas a Biyernes, Abril 30 ti panag-epektibo ti panakaikkat ti nasao nga enforcer nupay idi laeng Lunes a naiserbi ti termination letter daytoy.

-- Advertisement --

Kinunana a napaneknekan a nangiruar ti nasao nga enforcer iti utility knife nupay saan a nakaruar ti natadem a paset ti kutsilyo.

Nupay kasta, inlawlawagna a maibilang a nadagsen ti inaramid ti nasao nga enforcer a katukadna ti pannusa a panakaikkat iti serbisyo nangrunata public servants dagitoy ken iti paglinteganda ket saan a mabalin a mangiruar ti asinoman kadagiti enforcers iti igam tapnu mangbuteng iti tao.

(ni POSD Deputy Chief Daryl Kim Longid)

Sigun kenkuana, nainget ti panagbabawi ti nasao nga enforcer a maysa kadagiti kabayagan a personnel ti POSD ngem nasken a sangwen daytoy ti resulta ti naaramid daytoy.

Innayonna a nangiruar iti kutsilyo ti nasao nga enforcer kalpasan a na-black out wenno nagpaituray iti saan a nasayaat a desisyon kasaruno ti panangbugbugkaw ken panangkarit ditoy ti nakasungbatda a driver.

Inaklon pay ni Longid a nasinged a pagayamna ti nasao nga enforcer ken maysa kadagiti addaan kapintasan a performance iti panangipatungpal iti mandato dagitoy.