BAGUIO CITY – Naragsakan ti Public Order and Safety Division (POSD) ti Baguio City iti panakaibasura dagiti kaso nga impila ti maysa a PWD kontra iti tallo a personnel ti POSD idi napalabas a tawen.

Maipalagip nga iti maikatlo a lawas ti Disyembre 2020 ket impila ni Madino Codasi dagiti kaso a panaglabsing iti Magna Carta for Disabled Persons, cyber libel ken libel kontra kadagiti nasao a personnel ti POSD.

Kasaruno daytoy ti panangtiket ti dua a personnel ti POSD kenni Codasi gapu iti panag-jaywalk-na sadiay Lower Magsaysay.

-- Advertisement --

Nailanad iti desisyon ti City Prosecutor’s Office a naibasura dagiti kaso gapu iti kinakurang ti ebidensiya ken natibker a basaran tapno mapaneknekan a linabsing dagiti respondents ti linteg.

Nailanad pay iti desiyon a natibker dagiti ebidensia nga insumitir ti POSD a nakatulong iti panakaibasura dagiti kaso.

Sigun kenni POSD Deputy Head Daryl Kim Longid, ti desisyon ti korte ti basaran nga awan ti linablabsing dagiti personnel-da a kas kadagiti maipabpabasol kadakuada ken awan ti panagabuso nga inaramid dagitoy iti insidente a nakairamanan ni Codasi.

Innayonna a napaneknekan nga ar-aramiden laeng dagiti personnel ti POSD ti responsibilidad dagitoy.

Kagiddan iti daytoy, kiniddawna kadagiti umili a sakbay nga ag-react dagitoy kadagiti isyu ket nasken nga ammuenda ti pudpudno a napasamak.

Innayon ni Longid a naipa-iman kadagiti dua a POSD personnel a naipilaan ti kaso no mangipilada met ti kaso kontra kenni Codasi.

Sigun kenkuana, nakaru a naapektaran ken nadadael dagiti maseknan gapu iti napasamak a panangtiketda kenni Codasi a maysa a PWD.