-- ADVERTISEMENT --

BAGUIO CITY – Umdas ti pwersa ti kapulisan a mangwanawan ti sitwasyon ti siudad ti Baguio iti kanito a maipatungpalen ti General Community Quarantine (GCQ) iti lokalidad iti entero a bulan ti Pebrero.

Impanamnama daytoy ni Baguio City Police Office (BCPO) City Director PCol. Allen Rae Co iti baet a naksayan ti bilang dagiti personnel daytoy.

Kinunana a dumanon iti nasurok 500 a pulis ti impatulod kadakuada ti Police Regional Office Cordillera (PROCOR) kabayatan ti panagraira ti pandemya ngem naiwarasen dagiti agarop 400 a pulis iti nagduduma a lugar iti rehiyon Cordillera.

Impettengna a kabaelan ti BCPO nga iwanwan ti siudad ken kabaelanda nga ituloy ti mandato a sinapataan dagitoy.

Kagiddan iti dayta, kiniddawna ti kooperasyon ti publiko para iti panagsurotda kadagiti minimun heatlh standards tapno saan la unay a marigatan ti implementasyon dagiti nasao a pagalagadan.

-- ADVERTISEMENT --

Kabayatanna, inlawlawag ni PCol. Co a saanen a bambantayan dagiti pulis dagiti barangay a maipaspasidong iti lockdown.

Kinunana a mangipatpatungpalda laeng itan ti supervisory rule ken maar-aramat itan ti serbisyo dagiti baranggay health emergency response team, baranggay tanod, baranggay patrol team iti panagwanawanda iti masakupanda a lugar.