BAGUIO CITY – Panggep dagiti stakeholders iti vegetable industry iti Benguet nga agsurat kenni Agriculture Secretary William Dar tapnu kiddawen ti tulongna iti mapaspasaranda ita a nagduduma a parikut.

Iti interview ti Bombo Radyo Baguio kenni Agot Balanoy, panakabagi ti liga dagiti asosasyon iti La Trinidad Vegetable Trading Post, kinunana nga adun a mannalon ken local traders iti Benguet ti saan nabayadan ti insuplayda a nateng kadagiti restaurants ken hotels sadiay Metro Manila.

-- Advertisement --

Dinakamatna a minilyon a pisos ti gatad dagiti nasao a nateng a saan a nabayadan gapu iti panakalugi wenno panagrikep dagiti maseknan a restaurants ken hotels.

Sigun kenkuana, uray dagiti dadakkel a restaurants ken hotels a sigud a napintas ti rekordda iti panagbayad ket agparigat ita nga agbayad.

Innayonna a no makapatangda ni Secretary Dar ket ammuenda no anya ti maipaay daytoy a tulong kadagiti mannalon ken kadagiti local traders a saan a nabayadan.

Iramanda metlaeng nga idanun ti posibilidad a panakailukat ti dadduma a merkado para kadagiti highland vegetables tapnu saan laeng a maipamaysa sadiay Metro Manila.

Sigun pay kenni Balanoy, ilungalongda manen iti lokal a gobyerno ti La Trinidad, Benguet ti panakaipasa ti Revised Trading Post Code tapnu ma-accredit ken mairtengan dagiti buyers nga agturturong kadagiti trading centers iti probinsia ken maliklikan dagiti buyers a saan a makabael a mangbayad iti alaenda a natnateng.