photo | Philippine Athletics Track And Field Association

BAGUIO CITY – Agserbi ti Baguio City a host iti training bubble dagiti atleta ti Philippine Athletics Track and Field Association (PATAFA).

Mangrugi ti nasao a panagsanay inton Hulyo kas paset ti panagsaganada para iti 31st Southeast Asian Games a maangay sadiay Hanoi, Vietnam inton Nobyembre 21 agingga Disyembre 2 ti agdama a tawen.

-- Advertisement --

Sigun kenni PATAFA training director Renato Unso, napilida ti Baguio para iti nasao a bubble training gapu iti lokasyon, umdas nga sports facilities ken ti temperatura ti siudad a maipada iti temperatura ti Hanoi inton Nobyembre.

Inlawlawagna a makatulong ti temperatura ti Baguio iti panakaikondisyon ti bagi dagiti atleta ti pagilian iti track and field iti manamnama a temperatura ti Hanoi inton Nobyembre.

Nakedngan met a maaddaan ti delegasyon iti bukodda a medical team a makikoordinar kadagiti health authorities ti Baguio para iti panakaipasigurado ti panakataripato dagiti atleta.

Dinakamat met ni City Sports Coordinator Gaudencio Gonzales nga agarup 40 nga atleta ti agturong ditoy siudad para iti training bubble malaksid pay iti saan a nabigbig a bilang dagiti coaches ken trainers.