-- ADVERTISEMENT --

BAGUIO CITY – Biniag manen ti lokal a gobyerno ti Baguio dagiti temporary treatment and monitoring facilities (TTMFs) ti siudad kasaruno ti panagngato ti kaso ti COVID-19 iti lokalidad.

Sigun kenni Aileen Refuerzo, dadaulo ti Public Information Office ti Baguio LGU, na-activate ita ti maysa a hotel ken maysa a transient house a siguden a nagserbi kas temporary treatment and monitoring facility ti siudad.

Maipalagip a temporaryo a nairikep dagitoy idi Disyembre ti napalabas a tawen kalpasan a simmayaat wenno bimmaba ti kaso ti COVID-19 iti lokalidad.

Naamuan met nga adda pay ti dua a kapada a pasilidad ti siudad a nakasagana a maaramat tapnu maakomodar dagiti agbalin to a pasyente ti COVID-19.

Immunan a kinuna ti mayor ti siudad a napasayaat ti Baguio City Community Isolation Center Unit iti sigud a Santo NiƱo Hospital tapnu manayonan ti maakomodar daytoy bayat nga adda ti naibangon a kanayonan nga isolation areas kadagiti napalpalabas a bulan malaksid pay a nakasaganan a maipatungpal ti contingency plan ti Baguio kontra iti Omicron variant.

-- ADVERTISEMENT --

Manipud iti 40 laeng nga aktibo a kaso ti COVID-19 iti Baguio idi Disyembre 30, 2021 ket dimmanon iti 4,200 ti aktibo a kaso ti COVID iti siudad idi kalman, pakairamanan ditoy ti 574 a baro a kaso ti nasao a sakit.

maibasar iti rekord, nailista idi kanikadua, Enero 20 ti kangatuan a kaso ti Baguio a nailista iti uneg ti maysa nga aldaw a dimmanon iti 725 a sinaruno ti 646 a kaso a nailista idi Martes, Enero 18 ken iti 613 a kaso a nailista idi Sabado, Enero 15.