BAGUIO CITY – Makapaspasar iti diskriminasion ti dadduma a Pinoy worker sadiay Calgary, Canada kalpasan a naapektaran dagitoy iti panagraira ti COVID-19.

Iti interbyu ti Bombo Radyo Baguio kenni Reuel Manlongat, caregiver sadiay Calgary, Canada, kinunana nga adda ti dua a dadakkel a meat plants sadiay ken kaaduan kadagiti empleado dagitoy ket Pilipino.

-- Advertisement --

Kinunana a maysa kadagiti nasao a planta ket ti Cargill Meat Plant nga addaan iti nasurok 2,000 a workers a 60 agingga 80 a porsiento kadagitoy ket Pilipino.

Dinakamatna a kalpasan a nagwaras ti COVID-19 iti uneg ti nasao a planta ket nagrikep daytoy ngem kalpasan ti dua a lawas ket nailukat daytoy gapu ta agtataud iti daytoy ti kadekkelan a suplay ti karne ti baka iti intero a Canada.

Kinunana a gapu iti nasao a banag ket maidaddadanes dagiti Pilipino ken maba-bash dagitoy iti online.

– timek ni Reuel Manlongat, maysa a caregiver sadiay Calgary, Canada

Innayonna a sabali met laeng ti panagkita dagiti tattao sadiay kadagiti Pilipino nga agturturong kadagiti bangko ken groseria.

Sigun pay kenni Manlongat, maipaspasidong itan iti self-isolation dagiti apektado a Pilipino ngem awan ti eksakto a bilang no mano dagiti Pinoy a nakaptan iti COVID 19 sadiay.

Kinunana nga adu dagiti organisasion a mangipapaay iti relief goods kadagiti OFWs a saan a makaruar iti pagtaenganda.