BAGUIO CITY – Nakasaganan a mailukat kadagiti benipisaryo dagiti siyam a halfway houses a naibangon iti nagduduma a probinsia iti Northen Luzon a para kadagiti sigud a rebelde a simmuko iti gobyerno.

Naamuan nga 11 a halfway houses ti nakaprograma a maibangon iti Northern Luzon, no sadino, nakompleton ti siyam ken manarimaan ti konstruksion dagiti nabatbati a dua.

-- Advertisement --

Karaman kadagiti nakompleto a halfway houses ti masarakan iti Cordillera Region, partikular sadiay Lagangilang, Abra; Bontoc, Mountain Province; Tabuk City, Kalinga ken Kiangan, Ifugao.

Sigun kenni Lt.Gen. Arnulfo Marcelo Burgos Jr., commander ti AFP Northern Luzon Command (NOLCOM), kompleto ti amenities ken kagawaan dagiti nasao a balay ken kasapulan laeng a makabitan ti kuryente ken danum para iti naan-anay nga operasyon dagitoy.

Pinagyamananna met dagiti lokal a gobyerno ken ahensia a responsable iti panakapapartak ti panakakompleto dagiti nasao a pasilidad gaputa daytoy ti mangipakpakita iti natibker a tarigagay ken commitment dagitoy para iti panakagibus ti armado a panagrebelde.

Paset ti Enhanced Comprehensive Local Integration Program (E-CLIP) ti konstruksion dagiti halfway houses nga agserserbi a temporaryo a pagnaedan ken lugar para iti livelihood training ken psycho-socio debriefing dagiti sigud a rebelde ken pamilya dagitoy bayat a maipoproseso ti panakairamanda iti E-CLIP.

Maibasar iti rekord ti AFP NOLCOM manipud Enero 1 agingga Setyembre 5 ti agdama a tawen ket pakabuklanen a 602 dagiti sigud a rebelde a simmuko iti gobyerno iti masakupan ti Northern ken Central Luzon.