BAGUIO CITY – Binigbig ti Department of Public Works and Highways (DPWH) ti sakripisyo nga inpaay dagiti uppat a kameng ti DPWH-Cordillera ken maysa nga contractor a karaman kadagiti biktima iti mudslide a napasamak sadiay Banaue, Ifugao.

Sigun ken Juliet Aban, pannakangiwat ti DPWH-Cordillera, naipaayan iti Lingkod Bayan Award a pinirmaan ni DPWH Sec. Mark Villar ken tulong pinansyal dagiti uppat a kameng ti Ifugao Second DEO Maintenance Division.

-- Advertisement --

Naipaay met iti contractor ken operator ti heavy equipment a nagaburan ti Lingkod Bayan Award ken tulong pinansyal manipud iti Regional Director ti DPWH-CAR.

Kinunana a personal nga inpaima ni DPWH-Cordillera Regional Director Khadaffy Tanggol ti pammadayaw ken tulong pinansyal kadagiti pamilya kagiddan ti panagsarungkarda sadiay Ifugao idi Martes.

Impetteng ni Tanggol a saan a mabayadan iti aniaman a gatad ti heroism wenno kinabanwar nga inpakita dagitoy tapno makaipaayda iti serbisio kadagiti umili.

Maipalagip a makipaset koma dagiti biktima iti clearing operation kabayatan ti bagyo a Ulysses ngem gapu iti napigsa a tudo ket naglinong dagitoy iti maysa a balay.

Nupay kasta, nargaay ti daga iti ayan dagiti biktima a nagresulta iti trahedya.