-- ADVERTISEMENT --

BAGUIO CITY – Linawlawagan ni Governor Melchor Diclas ti impaulogna a memorandum a mangup-upay iti saan a naikoordinar a panakaiyakar iti Benguet General Hospital (BeGH) dagiti pasyente manipud iti dadduma a probinsia gapu iti panagadu dagiti maiturturong iti nasao a pagagasan.

Iti interview ti Bombo Radyo Baguio, dinakamatna nga addan ti Benguet iti high risk wenno level 4 a healthcare utilization rate a kaipapananna ti 60-70 percent a panaka-okupar dagiti ospital iti probinsia.

Sigun kenkuana, ti agdama a 28 nga aktibo a kaso ti COVID-19 iti probinsia ket adu unayen nupay kabaelan latta nga imaton daytoy dagiti healthcare workers.

Inyunay-unayna a no agtaud kadagiti high risk area dagiti pasyente a maiturong iti ospital iti Benguet ket kasapulan a maikoordinar a nasayaat iti lokal a gobyerno.

Innayonna a posible a dagiti agtaud kadagiti high risk area ket addaanen ti Delta virus isut gapuna a no mapastrek dagitoy iti probinsia ket posible a dagitoy ti pagtaudan ti nasao a napegpeggad a variant ti COVID-19 nangruna ta adda laeng kadagiti ward dagiti confirmed cases ti coronavirus iti BeGH.

-- ADVERTISEMENT --

Sigun pay kenni Gov. Diclas, iti agdama ket awan ti negative pressure building iti BeGH para kadagiti pasyente ti COVID-19 nupay addan ti pondo para iti daytoy.

Dinakamatna a no maaramid ti negative pressure building iti BeGH ket kabaelanen ti ospital nga agakomodar kadagiti pasyente ti COVID-19 a nasken a maipasidong iti isolation.