BAGUIO CITY – Kiniddaw ti lokal a konseho ti Baguio City babaen iti maysa a resolusyon ti panangilaylayon ti Land Transportation Franchising and Regulatory Board- Central Office iti deadline ti consolidation kadagiti public utility jeepneys (PUJs) ditoy siudad.

Kalpasan daytoy ti saan a panangaprobar ti regional office ti aplication for consolidation ti Mines View Gibraltar Transport Cooperative gaputa saanda nga immabot iti March 31 deadline.

-- Advertisement --

Inlawlawag ti presidente ti kooperatiba a ni Tito Dalilis a saanda a naabutan ti deadline gaputa uppat a bulan nga inurayda ti panangabprobar ti Cooperative Development Authority ti aplikasyonda a nangitunda ti saanda a dagos a panangisubmitir ti application iti regional office.

Inyunay-unayna metlaeng nga adu dagiti kasapulan a maisubmitirda nga requirements a maysa a rason ti pannakapaayda nga iproseso ti aplikasyonda sakbay ti deadline.

Gapu iti daytoy, nagkiddawda iti suporta manipod iti lokal a konseho ti panangiyapelada iti pannakailaylayon ti application for consolidation agsipodta adu pay dagiti entities a kayatda nga agconsolidate ngem saanda a nasabet ti deadline gapu iti nagduduma a rason.

Nupay kasta, impetteng ni LTFRB-CAR OIC Regional Director Engr. Lalaine Sobremonte, kabayatan ti sesyon a nasken a masurot ti deadline ken saanen a mailaylayon daytoy tapno saan nga unfair kadagiti dadduma a transport cooperative nga nangikagumaan a mangisubmitir iti aplikasyon sakbay ti deadline.

Kagiddan iti daytoy, inyapela ni Vice Mayor Faustino Olowan ti panangikonsidera ti LTFRB-CAR para iti humanitarian reasons ti kiddaw dagiti transport cooperative tapnu matulungan dagitoy iti pagbiaganda.