BAGUIO CITY – Naipasidong iti repatriation ti agarup sangagasut nga OFWs manipud iti nagduduma a paset ti Africa gapu iti epekto ti COVID-19 crisis.

Iti interbyu ti Bombo Radyo Baguio kenni Consul General Edgar Tomas “Gary” Auxilian ti Philippine Embassy in Kenya, kinunana a manipud kadagiti pagilian a sakup ti embahada ket adun a Pinoy ti nagawid ditoy Pilipinas kalpasan a napukawan dagitoy iti trabaho.

-- Advertisement --

Sakup ti embahada dagiti pagilian a Burundi, Comoros, Republic of Congo, Democratic Republic of Congo, Kenya, Malawi, Rwanda, Seychelles, Somalia, South Sudan, Tanzania, ken Uganda.

Dinakamat ni Auxilian a naipasidong iti repatriation ti 19 nga OFWs manipud Malawi, 52 manipud Kenya ken 28 manipud DR Congo ken amin dagitoy ket engineers.

Kinunana nga adu pay dagiti Pinoy nga agkidkiddaw a makaawid ditoy Pilipinas ngem agserserbi a karit ti pannakaipasidong iti lockdown dagiti nasao a pagilian ken maur-uray pay ti sungbat ti Department of Foreign Affairs.

Sigun pay ken ni Auxilian, “no work, no pay” ti dadduma nga OFWs sadiay Africa isut gapuna nga agparparikot dagitoy.

Nupay kasta, kinunana a maipapaayan dagitoy iti tulong ken mayoria kadagiti Pilipino sadiay ket adda iti nasayaat a kasasaad.

Pagyamyamanan ti opisial ti kinaawan ti Pilipino kadagiti nasao a pagilian a positibo iti COVID 19 nupay inaklonna a maal-alarma met dagitoy iti panagwaras ti nasao a virus.

Innayon pay ni Auxilian a kaaduan kadagiti OFWs iti nagduduma a paset ti Africa ket professionals kas iti engineers, mannursuro, missionaries ken dadduma pay.