-- ADVERTISEMENT --

BAGUIO CITY – Agtaltalinaed a ti rehiyon Cordillera ti kangrunaan a pagtataudan ti suplay ti marijuana iti entero a pagilian kasaruno ti agtultuloy a panagmula dagiti cultivators iti daytoy.

Iti panakiuman ti Bombo Radyo Baguio, binigbig ni Gil Castro, Regional Director ti PDEA-Cordillera a kinarigat ti biag ti kangrunaan a rason ti panagmula dagiti indibidual ti iligal a droga.

Gapu iti daytoy, imbinglayna a nakalukat ken nakasagana dagiti ahensiya ti gobyerno nga agdengngeg kadagiti idanon ti publiko a parikut wenno pakaseknan iti biag tapnu matulongan dagitoy ken saanda a masapul nga agmula ti marijuana.

Maibasar iti datus, nabigbig ti nagbedengan ti Mt. Province ken Kalinga a kadakkelan a pakaimulmulaan ti marijuana bayat nga adda dagiti matiltiliw iti sumagmamano a paset ti Benguet partikular sadiay Kibungan, Bakun, Kibungan, La Trinidad, Sablan ken sumagmamano a paset ti Abra.

Inaklonna a kabayatan ti pandemya ket immado ti agmulmula iti marijuana ngem impettengna nga addu kadagiti suplay a naapit idi pay napalabas a tawen ti saan a naibiyahe wenno nairuar iti rehiyon paturong sadiay NCR, Region IV-A ken Central Visayas gapu iti travel restrictions.

-- ADVERTISEMENT --

Naladingetan met daytoy gaputa kaadduan nga opisyales ti babarangay ket saanda a malapeddan dagiti agmulmula ti marijuana iti masakupan dagitoy iti rason a mabuteng dagitoy.

Mainaig iti dayta, binallaagan ni Castro a mapilaan iti administrative complain dagiti opisyales a mapaay a makikoordinar kadagiti otoridad seknan iti anti-drug campaign/operation.

Iti agdama ket maur-uray paylaeng ti panangberipikar ti anti-money laundering kadagiti dua a dadakkel a tao a maatap a financer wenno mangsupsuplay iti panagmula ti iligal a droga.