photo credit to owner

BAGUIO CITY – Kinasuanen ti person with disability (PWD) a natiketan gapu iti panag-jaywalk-na sadiay Lower Magsaysay, ditoy siudad ti Baguio ti personnel ti Public Order and Safety Division (POSD) a nangtiket kenkuana itay laeng nabiit.

Iti eksklusibo a panakiyuman ti Bombo Radyo Baguio kenni Madino Codasi, impilanan ti kaso idi kanikadua ken ur-urayenda laengen ti panagsabatda iti korte iti maseknan a personnel ti POSD.

Kinunana a posible kuma a naareglo wenno nasimpa ti isyu no nakitungtung ken nagkiddaw ti dispensar kenkuana dagiti dua a personnel ti POSD.

-- Advertisement --

Imbingayna nga iti aldaw ti insidente ket nagnada iti kadwana a kargador sadiay Hilltop tapnu aguray ti taxi nga agawid sadiay La Trinidad ngem gaputa awan ti maurayda iti igid ti kalsada sadiay Hilltop ket nagballasiwda iti bangir a linya ti kalsada tapnu aguray ti taxi.

Kinunana a dua nga addang laengen sakbay a madanunda ti tengga ti kalsada ket nanggegda ti pukkaw dagiti POSD personnel babaen ti megaphone dagitoy.

Ditoyen a kinumprontar dagiti POSD personnel ni Codasi ken ti kadwana ken kiniddawda ti I.D dagitoy.

Imparang ni Codasi ti imetna a PWD I.D ken inaklonna a nagbiddutda iti panagballasiw gaputa saanda nga impagarud a dagitoy ti mapukpukawan gapu ti kaado dagiti tao.

Nagpakaasi ni Codasi a no mabalin a mapalubusanda ken maipaayanda iti first warning ngem nagsina latta a tineketan dagitoy ti POSD personnel.