BAGUIO CITY – Dumanon iti P3.5-B a potential revenue ti Baguio ti napukaw ti siudad idi napalabas a tawen gapu paylaeng iti COVID-19 pandemic.

Sigun kenni Mayor Benjamin Magalong, nabigbig ti nasao a gatad babaen iti survey kadagiti hotels ken restaurants ditoy siudad.

-- Advertisement --

Kinunana a ti nasao a lugi ket intunda ti epekto ti pandemya iti industriya ti turismo ken iti agtultuloy a panagraira ti sakit.

Dinakamatna nga iti survey ti Hotel and Restaurant Association of Baguio (HRAB) ket P1.6-B ti lugi dagitoy ken rumrumwar a dumanon met iti P555-M ti lugida iti pasweldo.

Naamuan a nakaru a naapektaran dagiti hotels ken restaurants iti umuna a tallo a bulan ti panagrugi ti pandemya wenno iti Abril agingga ti Hunyo ti napalabas a tawen.

Maibasar iti rekord ti HRAB, dimmanon iti 1.7-M ti bilang dagiti turista a nagturong ditoy Baguio idi 2019, sakbay ti pandemya.

Dakkel ti bimmabaan ti nasao a bilang kabayatan ti pandemya gaputa dimmanon laeng iti nasurok 232,000 ti bilang dagiti turista a nagturong ditoy siudad.

Naamuan a tunggal turista nga agturturong ditoy siudad ket makagasgastos ti P2,700 iti innaldaw.