BAGUIO CITY – Agtaltalinaed a dagiti personnel ti Police Regional Office Cordillera (PROCOR) ti ‘Most Disciplined Cops’ iti pagilian iti baet ti panakaipila ti kaso nga administratibo iti sumagmamano kadagitoy.

Iti interview ti Bombo Radyo Baguio, kinuna ni PLt.Col. Marcial Paclibon, dadaulo ti Regional Internal Affairs Service ti PROCOR nga ita a tawen ket 18 a pulis ti napilaan ti kaso nga administratibo a katukad ti 0.26% iti pakabuklan a pwersa ti pulisya iti Cordillera.

Dinakamatna nga idi napalabas a tawen ket 27 laeng a pulis iti rehion ti napilaan iti kaso nga administratibo iti opisinada ken katukad daytoy ti 0.38% iti pakabuklan a pwersa ti PROCOR.

-- Advertisement --

Sigun kenkuana, kaaduan nga administratibo a kaso dagiti nasao a pulis ket misconduct kalpasan a nagaramid dagitoy iti maysa a banag a rumbeng kuma a saanda nga aramiden.

Innayon ni Lt.Col. Paclibon nga adda met dagiti pulis a naireklamo gapu iti biddut iti panagaramidda iti trabahoda ken adda met dagiti saan a nagaramid iti mandatoda.

Kinunana pay a nalpasen dagiti nasao a kaso nga iggem ti opisinada ken naisumitirdan ti resolusyon dagiti kaso iti maseknan a disciplinary authorities.