BAGUIO CITY – Nannayonan ti kaso ti UK variant sadiay Kalinga kasaruno ti panagpositibo dagiti uppat nga umili sadiay idi laeng kalman.


Inwaragawag daytoy ti Department of Health-Cordillera Regional Epidemiology and Surveillance Unit (CHD CAR RESU) rason ti panakaalarma ti Municipal Health Office ken City Health Office ti Kalinga.

-- Advertisement --


Manipud iti uppat a bilang, tallo ti lalaki ken maysa ti babae, agtawen dagitoy iti 25-anyos agingga 42-anyos ken residente sadiay Rizal, Pasil ken Tabuk City, Kalinga.


Naamoan a naipatulod dagiti specimen dagitoy sadiay Baguio General Hospital and Medical Center idi Marso singko ken Marso otso ti agdama tawen.


Gapu iti daytoy binilin ni PHO II Dr. Ed Tandingan ti CHO ken MHO a mangisayangkatda ti nainget nga imbestigasyon kadagiti nakapulopal dagiti nagpositibo iti UK variant manipud 1st agingga 3rd generation contacts tapnu maipasidongda iti swab test ken 14-day quarantine.

Kinunana a nasken a kompletoen dagiti COVID patient ken close contact ti isolation sakbayda a maipasidong iti re-swabbing tapnu makumpirmar nu negatibo ti maikadua nga RT PCR test dagitoy.


Inlawlawagna a mailaylayon ti isolation dagiti indibidual nga agtalinaed a positibo ti maikadua nga RT PCR test result dagitoy.


Maibasar iti datus, dumanonen iti innem a kaso ti UK variant ti nailista iti probinsiya ti Kalinga kalpasan a naerekord ti dua a kaso ti nasao a sakit idi Pebrero 17 ti agdama a tawen a sinaruno ti uppat a kaso idi kalman.