BAGUIO CITY – Makailislista ita ti probinsia ti Benguet iti siyam nga ipupusay iti inaldaw seknan iti COVID19.

Iti interview ti Bombo Radyo, imbutaktak ni Governor Melchor Diclas a daytoy ita ti average death rate a mailislistada iti inaldaw.

-- Advertisement --

Sigun kenkuana, agtaltalinaed a karit ti panakataming dagiti pasiente iti COVID19 agsipud ta napunpunnon dagiti ospital iti probinsiya nangruna ti Benguet General Hospital.

Kinunana a dumanon iti 200 ti average rate ti aktibo a kaso ti C0VID-19 iti probinsia ken sangapulo kadagitoy ket severe case wenno nakaro a kaso.

Innayonna a naaramaten ti 158 a katre a nailatang iti BeGH para kadagiti pasiente ti COVID-19 ken agkurang latta dagiti inbangonda a tents iti ruar ti nasao nga ospital gapu ta adu latta ti agpospositibo iti nasao a sakit.

Dinakamat pay ti gobernador a maar-aramat amin dagiti 11 a mechanical ventilators ken dadduma pay a medical supplies ken napunno metten dagiti quarantine ken islolation facilities ti probinsia.

Malaksid iti daytoy, kinunana ni Gov. Diclas a naksayan ti pwersa dagiti dotkor iti BeGH kasaruno ti panagikkat iti trabaho dagiti walo a doktor tapno maipasidongda iti panagsanay.

Nupay kasta, innayonna a nangaladan iti 10 a kanayonan a nurse ken umaw-awat metten ti probinsiya iti aplikasyon para kadagiti interesado a doktor a mangsukat kadagiti pimmanaw a doktor.