-- ADVERTISEMENT --

BAGUIO CITY–Inwaragawag ti Philippine Military Academy (PMA) a maipatungpal ti tinawen nga alumni homecoming ti akademya ita a tawen babaen iti “hybrid concept” gapu iti agdama a COVID-19 pandemic.

Iti sidong ti nasao a konsepto, dumanon laeng iti 30% ti physical attendance ti mapalubusan

Sigun kenni Major Cherryl Tindog, pannakangiwat ti PMA, bassit laeng kadagiti alumni iti makidar-ay pakairamanan dagiti awardees para iti limitado a face to face interaction bayat a dagiti dadduma nga alumni ket makipaset babaen iti Zoom Video Teleconferencing.

Maipatungpal ti homecoming inton Pebrero 12 agingga 13 iti PMA Grandstand sadiay Fort Gregorio del Pilar, Baguio City.

Kagiddan iti dayta, inyunay-unay ni Tindog nga adda iti permiso a naipaay kadakuada a mangipatungpal iti nasao a pasken manipod iti Inter-Agency Task Force on Emerging Infectious Diseases (IATF).

-- ADVERTISEMENT --

Dinakamatna a dumanon laeng iti 90 nga alumni ken awardees ti nangipasigurado a makadar-ayda iti nasao nga aktibidad.

Innayunna nga amin nga ag-attendar iti daytoy ket nasken a mangipakita iti medical certificate nga addaan negatibo a resulta ti RT-PCR ken Travel Authority.

Agserbi met kas guest of honor ken speaker ni Senate President Vicente Sotto III iti Annual General Membership Assembly inton Pebrero 12 nga addaan ti tema a “Passing on a Brighter Torch to our Successors” bayat nga agserbi kas Guest of Honor ken Speaker iti awarding ceremony ni Chief Justice Diosdado Peralta.