BAGUIO CITY – Balligi ti panagsubli iti uneg ti boxing ring ti maysa kadagiti nalatak a boxing coach/trainer ti Highland Boxing Promotions a naka-base iti La Trinidad, Benguet.

Daytoy ket kalpasan nga inabak ti 47-anyos a ni Joven Jorda ti ub-ubing a nakalabanna a boksingero manipud Thailand a ni Sauen Tsana babaen iti unanimous decision iti 6-rounds a labanda idi Sabado sadiay Bangkok, Thailand.

Iti interview ti Bombo Radyo Baguio, imbinglay ni coach Joven a tubo ti Leyte a tarigagayna ti agsubli iti uneg ti ring wenno ti lumaban kalpasan ti nasurok 12 a tawen a panaginanana gaputa agtaltalinaed ti rugso wenno issemna iti boksing.

-- Advertisement --

Daytoy ti comeback fight ni Jorda kalpasan ti panagretirona manipud iti naudi a labanna idi October 2009 sadiay Japan a naka-abakanna iti ima ni Hayato Kimura.

Gapu iti panangabak ni Jorda ket iggemnan ti rekord nga 18 wins nga addan ti 15 knockouts, 26 losses ken 4 draws.

Innayonna nga itultuloynan ti panagsublina iti boksing.

Naka-base ita sadiay Thailand ni Jorda, no sadino, daytoyen ti maibilang nga ‘oldest boxer’ ti Pilipinas.