BAGUIO CITY – Maituloy latta ti phase one bike lane project iti Baguio City a naponduan iti dumanon P50-M.

Imbinglay daytoy ni Engr. Teodorico Tan, Adviser/Consultant ti Traffic and Transportation Management Committee (TTMC) ti Baguio City iti panakiuman ti Bombo Radyo.

-- Advertisement --

Sigun kenkuana, linawlawaganna kadagiti opisyales ti lokal a konseho dagiti pakaseknan dagitoy a timmaud iti napalabas a sesyon a nagresulta iti panangipasa ti Sangguniang Panlungsod iti resolusyon a mangkidkiddaw iti saan pay a panakaituloy ti awarding ti nasao a proyekto iti nangabak a kontraktor.

Kinunana a naipalawagna a naimbag ti proyekto, pakairamanan ti kaudian a pagalagadan nga impaulog ti DPWH a nangimandato iti panakaisayangkat nga umuna ti feasibility study iti panakaimuntar dagiti bicycle lanes kadagiti national roads.

Inlawlawag ni Engr. Tan a naladaw unay ti nasao a pagalagadan ti DPWH gaputa nalpasen ti bidding ti bike lane project iti Baguio ken ti pagalagadan ket SAAN A PARA ITI BAGUIO ngem ketdi, para iti kapada a proyekto a maimplementar sadiay Metro Manila, Davao ken Cebu a naponduan iti Bayanihan Fund.

Innayonna a napaneknekan nga adda ti koordinasyon kadagiti maseknan nga ahensia ken iti lokal a gobyerno mainaig iti proyekto ken kinunsultada dagiti grupo dagiti agbisbisikleta ditoy siudad.

(ni Engr. Teodorico Tan, Adviser/Consultant ti Traffic and Transportation Management Committee ti Baguio City)

Inyunay-unay pay ni Engr. Tan a saan a maksayan ti vehicular traffic lane gaputa mabigbig laeng dagiti paset ti kalsada nga aramaten dagiti agbisbisikleta ken dagiti agbalin a bicycle lane ket makabilan ti logo ken signages.

Dinakamatna a biagenda pay ti awareness wenno panaka-ammo dagiti motorista tapnu agbalin dagitoy a naannad iti panagmanehoda kadagiti bicycle lanes tapnu tapnu maliklikan dagiti aksidente.

Impetteng ni Engr. Tan a nabayag unayen ti panakaipaay ti atension kadagiti agbisbisikleta.

(ni Engr. Teodorico Tan, Adviser/Consultant ti Traffic and Transportation Management Committee ti Baguio City)

Inyunay-unayna a napateg ken pagkasapulan ita ti bisikleta gaputa mabalinen daytoy a maaramat kas wagas ti transportasyon.

Namnamaenda a no agsubli iti normal ti sitwasyon ket agaramaten dagiti estudyante iti bisikleta iti panagturong dagitoy iti pagadalan a makatulong iti panakarisut ti parikut iti pagparadaan.