-- ADVERTISEMENT --

BAGUIO CITY – Mangnamnama dagiti transport group iti Cordillera a mairaman dagiti tradisional a jeep iti service contracting program ti gobierno iti kanito a maituloy manen daytoy.

Iti panakiuman ti Bombo Radyo Baguio, kinuna ni Pat Evangelista, dadaulo ti transport group iti Cordillera ken Region 1, dagiti laeng moderno a jeep wenno mini-bus ti kinontrata ti gobierno nga agpasada iti Libreng Sakay Program a nagleppasen idi Oktobre 30.

Dinakamatna a nupay dumanon laeng iti 50 ti bilang dagiti moderno a jeep ditoy rehion no idilig iti 5,000 a bilang dagiti tradisional a jeep ngem mapabpaboran latta ti bassit a bilang gaputa maysa kadagiti mandato ti gobierno a mapagbalin a mini-bus dagiti tradisional a jeep.

Impettengna a saan a tubtungaren ti transport group ti modernization program nga isaksakad ti LTFRB gaputa napintas ti konsepto daytoy ngem impaganetgetna a kurang pailaeng ti elemento ti nasao a programa.

Partikular a dinakamatna nga agingga ita ket saan pailaeng nga impaay ti gobierno ti inkarida a sag-P160,000 iti tunggal yunit ti tradisional a jeep kas pambayad iti panakapabaro dagitoy tapno mapagbalin kas mini-bus.

-- ADVERTISEMENT --

Inayonna a nupay ado itan dagiti drivers ken operators nga agtarigagay nga agaplikar iti modernization program ti gobierno ngem marigatan dagitoy gaputa maysa kadagiti kangrunaan nga ikalkalikagum dagiti funding agency partikular ti Landbank ken DPB ket ti duly approved Local Public Transport Route Plan (LTPRP).

Impettengna a saan pailaeng a polido ken naaprubaran ti LTPRP ditoy Baguio City isut gapuna nga awan ti maisumiter dagitoy kadagiti funding agency tapno makwalipikarda iti nasao a programa.

Gapu iti daytoy, iyap-apela ni Evangelista nga iraman ti gobierno dagiti tradisional a jeep nga agpasada iti sidong ti libreng sakay program saan laeng a limitado kadagiti moderno a jeep iti kanito a mapundoan manen ti nasao a programa.