-- ADVERTISEMENT --

BAGUIO CITY – Nagpalawag ti Baguio City Police Office (BCPO) kalpasan ti napasamak nga insidente sadiay Session Road idi kalman, no sadino, sinitar dagiti pulis ti maysa a healthcare worker a naka-angkas iti motorsiklo a nagresulta iti panagpagna daytoy manipud iti batog ti Post Office aginggat Baguio General Hospital and Medical Center (BGHMC).

Iti eksklusibo nga interbyu ti Bombo Radyo ken ni PCol. Allen Rae Co, director ti BCPO, kinunana nga idi naammuan dagiti pulis a maysa a health care worker ti babai a naka-angkas ket naipaayan daytoy iti konsiderasion ken saan daytoy a naarestar.

Inlawlawagna a napalagipan laeng ti nasao a healthcare worker ken ti asawa daytoy a driver ti naglugananda a motorsiklo nangruna ta maawatan ti pulisya ti pakaseknan daytoy.

– ni PCol. Allen Rae Co, director ti BCPO

Sigun kenkuana, sinaludsod dagiti pulis ti address ti health care worker ken naited kenkuana ti contact number ti BCPO Station 6 tapno mabalin daytoy nga agpatulong iti istasion ti pulisya no kasapulanna ti pagluganan.

Nupay kasta, dinakamatna nga iti baet a saan pay a nalpas a nagpalawag ti dagiti pulis ket pimmanawen ti health care worker ken nagnagnan daytoy nga agturong iti BGHMC.

-- ADVERTISEMENT --

Mamati daytoy nga amangan no nasair ti rikna ti nasao a frontliner isut gapuna a basta lattan daytoy a pimmanaw ken nagnagna.

– ni PCol. Allen Rae Co, director ti BCPO

Kinuna pay ti opisial a no nakauray koma ti nasao a health care worker ket nalabit a mismo a dagiti pulis a nakasaona ti nangitulod kenkuana iti BGHMC babaen iti “Libreng Sakay” a programa ti PNP.

Kagiddan iti daytoy ket kiniddaw ni Co a saan koman a mapadakkel ti nasao nga isyu gapu ta mamati daytoy a simple laeng a “miscommunication” ti napasamak.

Inyunay-unayna a maawatan ti pulisya ti pakaseknan dagiti agtartarigagay a mapalubusan ti angkas iti motosiklo ngem kinunana a masapul a matungpal ti linteg a mangipawpawil iti angkas.

Impanamnamana metlaeng a kanayon a nakasagana ti BCPO a mangilugan kadagiti medical frontliner la ketdi adda ti available a lugan ken personnel dagitoy.