BAGUIO CITY – Mangrugin inton ti Oktobre ita a tawen ti panangipaay ti Land Tranasporation Office (LTO) – Cordillera kadagiti driver’s license nga agpaut iti 10 a tawen.

Nupay kasta, linawlawagan ni LTO-Cordillera regional director Francis Ray Almora a saan nga amin a drivers ket makaala iti nasao a lisensia gaputa adda ti masursurot a kwalipikasyon.

-- Advertisement --

Inyunay-unayna a dagiti laeng awanan panaglabsing wenno dagiti addaan nadalus ti rekord iti LTO iti las-ud ti napalabas a lima a tawen ti maipaayan iti driver’s license nga agpaut iti 10 a tawen.

Dinakamatna nga agtalinaed a lima a tawen ti panagpaut ti lisensia ti maysa a driver no makitaan daytoy ti panaglabsing kadagiti linteg trapiko.

LTO-Cordillera regional director Francis Ray Almora

Kabayatanna, mailaylayon ti panangiparehistro dagiti driver iti lugan dagitoy gapu iti agdama a pandemya.

Sigun kenni Almora, dagiti lugan nga addaan plaka nga agleppas iti ‘6’ ket mabalinen nga agparehistro agingga inton August 31 ti agdama a tawen bayat a dagiti addaan plaka nga agleppas iti ‘7’ ket mabalin nga agparehistro agingga inton September 30 ti agdama a tawen.

Kinunana pay nga adda ti 60 nga aldaw nga impaayda a pawayway ken awan ti multa a bayadan dagiti driver no naladaw dagitoy.