-- ADVERTISEMENT --

BAGUIO CITY – Saan a mapnek dagiti stakeholders ti vegetable industry iti Cordilleras iti aksion dagiti sumagmamano nga ahensia ti gobyerno mainaig iti panagraira dagiti smuggled a natnateng manipud China nga iligal a naiserrek iti pagilian ken mailaklako ita iti Divisoria Market sadiay Manila.

Iti panakiuman ti Bombo Radyo Baguio, impetteng ni Agot Balanoy, panakangiwat ti liga dagiti asosasyon iti La Trinidad Vegetable Trading Post a daytoy ket gaputa saan nga epektibo ti nagbalin nga aksion ti gobyerno iti nasao a pakaseknanda.

Impettengna nga iti baet ti panagrebbek sadiay Divisoria Market a nakakumpiskaran dagiti smuggled carrots ket nagsubli metlaeng ti panagilako iti nasao a produkto kalpasan ti uppat nga aldaw, partikular iti Carmen Planas Street ken Recto Avenue sadiay Tondo, Manila

Gapu iti daytoy, makikokoordinardan iti opisina ni Senate President Tito Sotto para iti panangimbestigar ti Senado iti isyu tapnu naan-anay a masolusyonan.

Impettengna a nasken a dagiti smugglers ti matiliw ken dagiti dadakkel a cold storages a pakaiduldulinan dagiti smuggled vegetables ti marebbek saan ket a dagiti laeng pwesto dagiti retailers nga agilaklako kadagiti nasao a nateng.

-- ADVERTISEMENT --
– ni Agot Balanoy, panakangiwat ti liga dagiti asosasyon iti La Trinidad Vegetable Trading Post

Naduktalan iti imbestigasyonda a technical smuggling ti mapaspasamak gaputa legal dagiti dokumento dagiti container vans a naikabilan dagiti smuggled carrots ken ti naideklara a linaon dagitoy ket dagiti agricultural products a maipalpalubos a maangkat manipud China kas kadagiti prutas.

Inyunay-unay pay ni Balanoy a kabaelan ti Cordillera a mangited iti pagkasapulan kadagiti nateng ken saanen a kasapulan nga ag-angkat kadagitoy.

Immunan nga impeksana a dakkel ti epekto ti kaadda ti smuggled vegetables iti merkado sadiay Manila gaputa adun nga orders ti nateng ditoy lokalidad ti kinanselar dagiti buyers.

– ni Agot Balanoy, panakangiwat ti liga dagiti asosasyon iti La Trinidad Vegetable Trading Post

Mangnamnamada met nga aggarawen ti Inter-Agency Task Force a binukel ti Department of Agriculture tapnu marisut ti pakaseknan.

Dinakamatna nga umadanin ti peak season ti nateng ken no saan a marisut ti isyu sakbay ti Disyembre ket kaasi dagiti mannalon gaputa saanen a magatang dagiti karot nga inmula dagitoy.