BAGUIO CITY – Inlawlawag ti Land Transportation Franchising and Regulatory Board (LTFRB) – Cordillera ti rason no apay nga inaprobaranda ti panagbiahe ti kanayonan a 50 nga yunit ti taxi a kiniddaw ti maysa a transport cooperative sadiay La Trinidad, Benguet.

Kinuna ni LTFRB-Cordillera OIC Regional Director Lalaine Sobremonte a sakbayda nga inaprobaran ti kiddaw ket kinonsultada amin a miembro ti BLISTT Area ken ditoy nga impaay dagitoy ti panangaprobarda iti nasao a kiddaw.

-- Advertisement --

Innayonna a nainget a tiningiting ken inadalda ti kiddaw sakbayda nga inaprobaran iti regional level.

Dinakamatna pay a saan met a nagreklamo ti lokal a gobyerno ti Baguio iti panakaipalubos ti panagbiahe ti kanayonan a 50 nga yunit ti taxi sadiay La Trinidad.

Nupay kasta, napagtulagan a saan pay nga agturong dagiti nasao a taxi iti Baguio nangruna ta karugrugi met ti panagbiahe dagiti 200 nga yunit ti taxi iti siudad.

Imbinglayna a kinasaritana metlaeng ti nasao a kooperatiba ken ditoy nga inyunay-unayna ti ruta dagitoy a ‘La Trinidad to any point in Cordillera’.

Iti agdama, nakasaganan ti endorsement ti kiddaw para iti kaskenan nga aksion ti Central Office ti LTFRB.

Iti baet daytoy, linawlawagan ni Sobremonte a saan a ti LTFRB-Cordillera ti pinal nga agdesisyon iti kiddaw gaputa adda ti proseso a masursurot.