-- ADVERTISEMENT --

BAGUIO CITY – Maiyaw-awis pay kadagiti umili ti Baguio a saan pay a nakaawat ti bakuna kontra COVID-19 ti panakipasetda iti agtultuloy a #BayanihanBakunan wenno kadagiti maipatpatungpal a panagbakuna kadagiti vaccination sites ditoy siudad.

Iti interview ti Bombo Radyo Baguio, imbinglay ni Assistant City Health Services Officer, Dr. Celia Flor Brillantes a dumanon iti 54,000 nga indibidual ti saan pay a nabakunaan iti siduad.

Sigun kenkuana, buklen dagitoy dagiti nakarehistro ken agur-uray iti naituding nga aldaw ti panagbakuna ken dagiti saan pay a nabakunaan.

Inyunay-unayna met ti kinapateg ti panakabakuna ti maysa nga indibidual nangruna dagiti mangmangged wenno kanayun a rumrumwar iti pagtaenganda.

Immuna metten nga imbilin ti mayor ti siudad a mandatory ti panagpasidong iti COVID-19 testing dagiti saan paylaeng a nabakunaan nga on-site wenno eligible workers nga agtabtrabaho iti gobyerno ken pribado nga institusyon ditoy Baguio.

-- ADVERTISEMENT --

Impetteng ni Dra. Brillantes a napateg a masalwadan ti bagi ken komunidad manipud iti coronavirus nangruna ta addan ti pangta ti Omicron variant.

Iti kaudian a datus, nasuroken iti 6,500 nga residente ti siudad ti nabakunaan iti #BayanihanBakunahan.