BAGUIO CITY – Kinuwestionaran ti maysa nga ama ti panakarakrak ti entero a balayda sadiay Purok 3, Barangay Fairview ditoy Baguio City iti baet a pribado a lote ti nakaibangonan ti balay ken pribado daytoy a sanikua.

Iti interview ti Bombo Radyo Baguio kenni Edwin Ariza, inaklonna nga adda ti kaso ti lote a nakaibangonan ti balayda, no sadino, tagtagikua-en ti maysa a kaarubada ti 14-square meters iti paset ti balayda.

-- Advertisement --

Kinunana nga adda ti naawatda a 15-day notice para iti panakarakrak ti 14-square meters a paset ti balayda a tagtagikua-en ti kaarubada.

Sigun kenkuana, nagtungpal iti nasao a paka-ammo isut gapuna a boluntaryo a rinakrakda ti paset ti balayda a tagtagikuaen ti nasao a kaarubada, agarup makabulanen ti napalabas.

Gapu iti daytoy, naklaat laengen ti pamilyada idi adda ti sinmangpet a personnel manipud iti city government a nangrakrak iti entero a pagtaengan dagitoy idi agsapa.

Inrason ti kaaruba da Ariza a maaramid a paradaan wenno pagbweltaan ti lote a nakaibangonan ti balay a narakrak ngem impetteng ni Ariza a saan pay nga indonar ti presidente ti subdivision ti kalsada nga asideg iti balay da Ariza iti lokal a gobyerno ti Baguio.

Iti agdama, nagkamang laengen ti pamilya Ariza kadagiti kaaruba dagitoy agingga a saanda paylaeng a nakabiruk iti pagakaran bayat nga imbinglayna nga awan ti planod a mangilaban iti kasoda gaputa awan ti pagbayad dagitoy iti abogado.