-- ADVERTISEMENT --

BAGUIO CITY – Iyap-apela dagiti Zumba Instructors iti Burnharm Park a maksayan ti maisaksakad a P100 nga innaldaw a bayadanda iti lokal a gobyerno ti Baguio.

Maipalagip a panggep ti maisaksakad nga ordinansa a panagbayad dagiti fitness instructors ti P100 iti innaldaw para iti panakamintinir ti aglawlaw ti nasao a parke.

Sigun kenni Grace Luzares, bise presidente dagiti zumba instructors iti Burnham Park, nadagsen iti bulsa ti nasao a gatad a katukad ti P3,000 iti binulan nangruna ta agbaybayad pay dagitoy iti special permit.

Kinunana a bassit laeng ti makolkolektarda a bayad kadagiti kliyenteda gaputa saan nga amin ket agbaybayad ken adda pay dagiti sumagmamano a kliyente a tumaray.

(ni Grace Luzares, bise presidente dagiti zumba instructors iti Burnham Park)

Innayonna a saan nga agpapada ti bilang dagiti kliyente ti maysa a fitness intructor ken sumagmamano kadagitoy ket ti laeng panangisuro ti ehersisyo ti pamastrekanda.

-- ADVERTISEMENT --

Nupay kasta, kidkiddawenna nga iti kanito a saan a mapatgan ti kiddawda ket mangipaay ti lokal a gobyerno iti libre a kuryente tapno saanda a pagparikutan ti panag-charge ti baterya ti speaker a maaramat iti panag-ehersisyo.

Iti agdama, 13 a fitness instructors ti agisursuro ti zumba sadiay Burnham Park.