-- ADVERTISEMENT --

BAGUIO CITY – Makidkiddaw ti panangidaulo dagiti amin a mayor ti probinsia ti Ifugao iti indignation rally a mangkondinar iti panangpapatay dagiti rebelde a New People’s Army iti sigud a kapitan sadiay munisipyo ti Tinoc.

Nailanad daytoy iti Joint Resolution No.1, series of 2020 nga impaulog ti Provincial Peace and Order Council ken Provincial Anti-Drug Abuse Council ti Ifugao.

Makidkiddaw iti resolusyon ti panangisayangkat dagiti 11 a mayor iti simultaneous indignation rally inton March 29 para iti panangkondinarda iti inaramid dagiti rebelde iti daydi sigud a Tukucan Barangay Captain Joseph Calabson.

Maipalagip nga idi March 2 ket pinalpaltogan dagiti tallo a rebelde ni Calabson bayat nga adda daytoy iti uneg ti pagtaenganda sadiay Tukucan, Tinoc, Ifugao ken nangibati dagiti rebelde iti surat ti panangaklonda iti krimen ken iti akusasyonda nga intel ti militar ti biktima.