BAGUIO CITY – Naannayas ti panakaipatungpal ti panagrugi ti flexible wenno blended learning iti School Year 2021-2022 iti rehion Cordillera idi kalman.

Sigun kenni Department of Education – Cordillera Regional Director Estella Cariño, nakasaganan dagiti mannursuro iti rehiyon a mangipatungpal iti bukodda a modalities wenno wagas ti panagisuro.

-- Advertisement --

Kinunana a dimmar-ay ti kaaduan a mannursuro iti insayangkatda a panagsanay seknan iti panakaipatungpal ti nagduduma a modalities wenno wagas iti baet a nakabakasyon dagitoy.

Impannakkelna nga adda met dagiti mannursuro a nagaramid ti video lessons bayat a nakabakasyon wenno addada iti uneg ti pagtaengan dagitoy.

Dinayawna met ti inaramid ti DepEd-Mountain Province a nang-simplify kadagiti napuspuskol a self-learning modules dagiti estudyante.

Kinunana a pinagkaykaysa dagiti mannursuro dagiti leksion babaen iti maymaysa a modality – ti video wenno online messenger.

Maipalagip nga idi Lunes, September 13 ti pormal a panaglukat ti klase iti elementarya ken sekondarya iti pagilian ngem naitantan idi kalman, September 14 gapu iti panakarambak ti maika-35 nga anibersaryo ti Sipat Peace Talk iti Cordillera.