-- ADVERTISEMENT --

BAGUIO CITY – Naiyunay-unay manen kadagiti kandidato iti masungad nga eleksion ti nainget a panakaipawil ti political rallies ditoy siudad agingga a saan pay a pormal a nangrugi ti panagkakampanya inton 2022 National ken Local Elections.

Iti panakiyuman ti Bombo Radyo Baguio, dinakamat ni City Administrator Engr. Bonifacio de la Peña a dagiti laeng motorcades ti mapalubosan ditoy siudad kas maitunos iti pagannurutan ti lokal a gobierno.

Kinunana a dagiti organizers laeng ti motorcades ti ipaayanda iti permit nupay saandan nga ikalikagum ti health certificate wenno aniaman nga health requirements gaputta saan a rumbeng a bumaba dagiti motorista ken nasken a tuloy-tuloy ti panagpatarayda aginga iti registrastion area dagitoy.

Imbinglayna pay nga addan ti naisayangkat a motorcade ditoy siduad babaen kadagiti tagasuporta dagiti kandidato iti nasional a posision.

Immuna iti daytoy, nangipaulogen ti siudad kadagiti pagalagadan a masurot iti panakaimuntar dagiti promotional materials dagiti politiko kas kadagiti posters ken tarpulins ditoy lokalidad.

-- ADVERTISEMENT --

Mabalin a maimuntar ti promotional material dagiti politiko kadagiti pribado a lugar nangruna no adda pammalubos dagiti agtagikua bayat a nainget a maiparit ti panakaikarga ti tarpulin wenno posters dagiti politiko kadagiti parapubliko a lugar.

Kabayatana, ibilbilang ti COMELEC – Cordillera nga immoral ti nasapa a panagkampanya dagiti agkandidato para iti May 2022 National and Local Elections.

Sigun kenni COMELEC-Cordillera Regional Director Atty. Ederlino Tabilas, iligal dagiti amin nga aktibidad dagiti aspirant a konektado iti panagkampanya uray saan pay a nadanun ti naituding a panagkampanya.

Kinunana a ti panagrugi ti campaign period ket inton March 25 agingga May 7, 2022 para kadagiti tumaray iti kina-kongresista, gobernador, bise-gobernador, mayor, bise mayor ken konsehal.

Nupay kasta, inaklonna nga iti agdama ket awan paylaeng ti kontrolda kadagiti agkamkampanyan a kandidato isut gapuna a saanda a mabalin a pakibiangan dagitoy ngem iti kiddawda laeng ket saan pay kuma nga agkampanya dagiti aspirants.

Inlawlawag pay ni Tabilas a saan pay a rumbeng a maawagan dagiti nangipila ti COC nga opsiyal a kandidato no di ket aspirants.

Impettengna a ti nasapa a panagkampanya dagiti nasao a personalidad ket mangipakakita laeng a saanda a sumursurot kadagiti paglintegan.//RMBLS