photo | DepEd-CAR

BAGUIO CITY – Pinagyamanan ti lokal a gobyerno ti Buguias ti Deparment of Education (DepEd)-Cordillera kasaruno ti panakairaman ti Buguias National High School kadagiti pilot schools iti probinsia nga agnumar iti Project Salaknib Tan Namnama.

Panggep ti proyekto a matulongan dagiti nakukurapay nga estudyante a saan a makabael nga agadal babaen ti panangipaay ti ahensia iti educational assistance.

-- Advertisement --

Sigun kenni Buguias Mayor Ruben Tindaan, dakkel a tulong ti proyekto gaputa paregtaen daytoy dagiti estudyante tapno igaedda nga adal iti baet ti agdama a pandemya.

Impanamnama met ni DepEd-Cordillera Regional Director Estela Cariño a maiyawat dagiti tablets, grocery packs, health kits ken school supplies kadagiti benipisaryo nga estudyante.

Kinarit met ti mayor dagiti benepisyaryo ti Project Salaknib Tan Namnama sadiay Buguias nga ikagumaanda nga agturpos iti panagadal gaputa daytoy laeng ti maisubalitda iti tulong ti nasao nga ahensiya.

Kiniddaw met ni Cariño ti agtultuloy a panangigiya ken panangparegta dagiti nagannak ken guardians kadagiti ubbing gaputa saan laeng a ti DepEd ti adda akemna iti panangragpat dagiti ubbing kadagiti arapaap dagitoy.

Naamuan pay a tunggal learner-beneficiary ket addaan ti sponsor a mangited ti partikular a gatad iti linawas wenno binulan para iti estudyante agingga a makaturpos daytoy iti basic education.