screen shot | google map

BAGUIO CITY – Linawlawagan ti kapitan ti Irisan Barangay ditoy siudad ti Baguio a maysa laeng a purok sadiay ti naipasidong iti lockdown gapu iti panakapaay dagiti residente nga agtungpal iti maiyem-implementar a minimum public health standards kontra iti COVID-19.

Iti panakiuman ti Bombo Radyo Baguio kenni Punong Barangay Arthur Carlos, dinakamatna a ti laeng Purok 12 ti naipasidong iti whole lockdown gapu iti saan a panakasurot ti health protocols sadiay.

-- Advertisement --

Imbinglayna met nga adda dagiti dadduma a naka-house lockdown sadiay Irisan, partikular sadiay Purok 22, Purok 23, Kalinga Street iti Purok 14-A ken iti Purok 14.

Inaklonna a kaaduan nga umili ti Irisan ti agtungtungpal kadagiti health protocols ngem adda latta dagiti sumagmamano a natangken ti uloda a pilosopo a sumungbat no bagaanda dagitoy iti panagtungpalda kadagiti health protocols.

Innayona a kanayon ti panagrikosda kadagiti purok ti Irisan tapnu bagaan ken palagipan dagiti umili sadiay iti panagtungpalda kadagiti pagalagadan tapnu saanda a ma-lockdown ken saanen nga agwaras pay ti COVID-19.

Impasigurado pay ni Kapitan Carlos nga adda dagiti relief packs a maipapaay kadagiti pamilya a naipasidong iti lockdown sadiay Irisan.

– ni Punong Barangay Arthur Carlos ti Irisan, Baguio City

VC CARLOS

Immuna iti daytoy, dinakamat ni Mayor Benjamin Magalong ti panakai-lockdown ti tallo a purok sadiay Irisan Barangay idi napalabas a lawas gapu iti panakapaay dagitoy a mangtungpal kadagiti maiyem-implementar a minimum public health standards kontra iti COVID-19.

Kinunana nga agtultuloy a maipatungpal ti wide-scale lockdowns kadagiti disso wenno lugar a makitaan ti kinasukir kagiddan ti panangirteng ti siudad kadagiti pagalagadan gapu iti pangta ti panagngato manen dagiti kaso ti COVID-19 nga itunda ti napalukayan a panagbiahe dagiti tattao ken iti presensia ti baro ken napegpeggad a variants ti COVID-19.