BAGUIO CITY – Mangnamnama ti Commission on Elections (COMELEC) – Baguio a maartapaan ti 10,000 nga indibidual a puntiryada a mairehistro agingga Setyembre 30 ti agdama para iti eleksion inton sumaruno a tawen.

Sigun kenni City Election Officer Atty. John Paul Martin, naibasar daytoy iti 100 a bilang dagiti indibidual nga agturturong iti opisinada iti innaldaw.

-- Advertisement --

Dinakamatna a dumanon laeng iti 147,650 ti nailista a botante ti Baguio City, nababa daytoy no idilig iti 164,125 a datus idi katengngaan ti 2019.

Inlawlawagna a resulta daytoy ti de-listing wenno ti panakaikkat iti listaan dagiti nagan dagiti botante a saan a nagbotos idi naudi nga eleksion.

Gapu iti daytoy, aw-awisenna manen ti publiko nga agturongda iti opisina ti COMELEC tapno agparehistro bayat a nawaya paylaeng ti aldaw.