-- ADVERTISEMENT --

BAGUIO CITY – Kidkiddawen ti Department of Agriculture (DA) ti panaka-aramat dagiti COVID-19 checkpoints ditoy rehiyon iti panakaprebentar ti iseserrek ti African Swine Fever (ASF) virus iti masakupan ti Cordillera.

Sigun kenni DA-Cordillera regional director Cameron Odsey, mabalin nga aramaten dagiti lokal a gobyerno dagiti nasao a checkpoints iti panangsukimatda ti panakaiserrek dagiti baboy iti rehion tapnu malimitaran ti panakaiyakar ti ASF virus.

Kinunana nga iti agdama ket addan ti kaso ti ASF virus infection iti probinsia ti Benguet, Ifugao ken Kalinga.

Maipalagip a ti suplay ti baboy iti Baguio City ket agtataud sadiay lowland kas iti Ilocos ken Central Luzon bayat a sadiay Tabuk City, Kalinga ket addaan laengen iti 30 percent a suplay ti karne ti baboy.

Kabayatanna, dumanon metten iti 509 a baboy ti pwersado a napapatay iti probinsia ti Benguet gapu iti panakaimpeksion dagitoy iti ASF virus manipud Enero agingga idi napalabas a bulan ti Hulyo.

-- ADVERTISEMENT --

Masarakan met dagiti ASF checkpoints iti Kennon Road, Marcos Highway ken San Pascual iti masakupan ti Tuba, Benguet; iti Bayabas sadiay Sablan; iti Pito sadiay Bokod; ken iti Colalo sadiay Mankayan.