BAGUIO CIY – Makidkiddaw ti panangipaay dagiti barangay iti siudad ti Baguio iti service vehicles para kadagiti umili iti masakupan dagitoy a nagpositibo iti COVID-19 a maiturong kadagiti isolation facilities ken ospital.

Kasaruno daytoy ti panangkiddaw ti City Health Services Office (CHSO) iti tulong dagiti barangay iti panakanayon ti pwersa iti transportasyon dagiti COVID patients gapu iti agtultuloy a panagado ti kaso ti COVID-19 iti siudad.

-- Advertisement --

Naamuan nga idi napalabas a lawas ket nailatang ti lugan dagiti barangay ti Trancoville, Pacdal, Gibraltar ken Phil-Am kas transport service para kadagiti pasyente a nakaptan ti COVID-19 iti barangay dagitoy ken iti distrito a nakairamananda.

Sinukimat da CHSO Medical Officer/Baguio City Emergency Medical Service head Dr. Dandeo Halog ken Sanitation Division Chief Engr. Charles Carame dagiti nasao a barangay transport services.

Sigun kadakuada, dagiti laeng asymptomatic COVID patients ti mailugan kadagiti nasao a barangay transport services.

Naamuan a manipud nangrugi ti pandemya, nadutukan ti Baguio City Emergency Medical Services iti transportasyon dagiti positive patients manipud iti balayda agingga kadagiti isolation facilities wenno ospital ngem gapu iti panagngato ti kaso ti COVID-19 ita ket saan nga umdas ti limitado nga ambulansa ken lugan daytoy.

Nadutukan met ti City DRRM Office iti inter-facility transport dagiti pasyente ken panakaitulod paawid dagiti pasyent a makaruar kadagiti pasilidad ken ospital.

Kagiddan daytoy ti panangtungpalda iti mandatoda a mangakomodar iti emergency transport needs dagiti non-COVID-19 patients.

Gapu iti umad-ado a kaso ti COVID-19 iti siudad, maad-adal ita ti dadduma a wagas tapnu marisut ti parikut iti transportasyon dagiti pasyente ti COVID-19 iti koordinasyon ti Traffic and Transport Technical Working Group ti Baguio.