-- ADVERTISEMENT --

BAGUIO CITY – Agtaltalinaed a generally peaceful wenno nakappia ti rehion Cordillera.

Impannakkel daytoy ti Police Regional Office Cordillera (PROCOR) iti naangay a Third Quarter Regional Peace and Order Council a naangay iti siudad ti Baguio.

Maibasar iti report ti PROCOR, dumanon iti 423 a krimen ti nailista iti entero a rehion idi Hunyo agingga Hulyo ti agdama a tawen ken daytoy ket nababbaba iti 104 nga insidente wenno 19.73% no idilig iti 527 a krimen a nailista iti rehion idi Hunyo agingga Hulyo idi napalabas a tawen.

Nakaisayangkat dagiti pulis ti rehion iti 125 nga operasyon kontra iti iligal a droga a nagresulta iti panangtiliwda iti 122 nga indibidual a pakairamanan ti 67 a High Value Individuals ken panakakumpiskar ti agarup P214.63-M a gatad ti iligal a droga ken lima nga armas.

Nagresulta met iti panagsuko ti 63 a personalidad ti kampanya ti pulisya kontra iti panagrebelde ken ti panakaisuko pay ti 37 a nagduduma nga armas ken 13 a pampabettak.

-- ADVERTISEMENT --

Kabayatanna, impannakkel met ni Philippine Drug Enforcement Agency-Cordillera regional director Gil Castro a manipud Abril 1 agingga Agosto 15 ket dumanon iti 249 ti operasyon kontra iti iligal a droga a naisayangkat dagitoy iti rehion.

Kinunana a nagresulta dagiti nasao nga operasyon iti panakakumpiskar ti agarup P691.22-M a gatad ti iligal a droga, panakatiliw ti adu a drug personalities ken ti panakaipila ti 314 kaso iti korte.

Imparangna metlaeng dagiti tallo a sindikato ti iligal a droga ken 103 a drug personalities nga inwanawan dagitoy, pakairamanan ti 64 a target listed ken 39 a watch listed.

Impannakkel pay ni Castro nga iti barangay drug clearing program ket 361 manipud kadagiti 1,177 a babbarangay iti Cordillera ti addaan estado nga ‘unaffected barangay’ bayat a 749 a barangay ti drug-cleared ken ti nabatbati a 67 a babbarangay a drug-affected ket nakapila para iti revalidation ken drug clearing.