BAGUIO CITY – Balballaagan ti Kalinga Provincial Tourism Office ti publiko manipud iti agraraira a diaya a tour packages a paturong iti nagduduma a destinasyon ti probinsia.

Kasaruno daytoy iti panangipablaak dagiti travel organizers iti social media maipapan iti travel packages para iti nasao a probinsa partikular sadiay Buscalan, Tinglayan.

-- Advertisement --

Sigun kenni Kalinga Provincial Tourism Officer Lorraine Ngao-i, binallaagan ken binilindan dagiti nasao nga organizers iti panangikkat dagitoy kadagiti nasao a social media posts.

Inlawlawagna nga agingga ita ket maiparit dagiti amin a tourism activities iti nasao a probinsya ken adda ti naipaulog a pammilin para iti daytoy gapu iti agdama a pandemya.

Kagiddan iti daytoy, kiniddawna ti kooperasyon ken panakaawat ti publiko seknan iti saanda pay a panang-awat kadagiti turista sadiay para iti kinatalged dagiti umili.

Innayonna a makibinbinaddang dagitoy kadagiti nagduduma a munisipyo sadiay Kalinga para iti panakabukel dagiti pagalagadaan ti public health safety ken tourism activities a maipatungpal iti kanito nga aglukat ti turismo dagitoy.