BAGUIO CITY – Ipalpalagip manen dagiti otoridad ti nainget a panagridam ken panagannad dagiti motorista kabayatan ti panagdalyasatda kadagiti kalsada kagiddan ti dakes a sasaaden ti panawen.

Kasaruno daytoy ti panaka-aksidente ti maysa nga SUV iti deppaar ti Abra-Kalinga-Road partikular sadiay Pacpaco, Gaddani, Tayum, Abra idi kalman.

-- Advertisement --

Maibasar iti report, ti driver ti nasao nga SUV ket ni Atty. Jemen Ambre Mateo, 44-anyos, empleyado ti Public Attorney’s Office ken residente ti Balais, Lagangilang, Abra.

Maibasar iti report ti Tayum Municipal Police Station, daldalyasaten ti SUV nga imanmaneho ni Atty. Mateo ti Abra-Kalinga-Road paturong iti munisipyo ti Bangued.

Nupay kasta, idi nakadanun daytoy sadiay Gaddani, nagpalia ti preno ti luganna ken sadiay nga aksidente a simmagid iti poste ti kuryente ken naidungpar iti pader ti maysa a compound.

Nagsagrap met ni Atty. Mateo iti bassit a dunor iti imana.

Naduktalan a nadadael ti preno ti SUV ken pasaray ag-lock iti manibela a nagresulta iti nasao nga aksidente.