-- ADVERTISEMENT --

BAGUIO CITY – Kinumpirmaren ti liderato ti Philippine Military Academy (PMA) ti panagpositibo iti COVID-19 dagiti kadete, civilian human resource ken organic military personnel ti akademya.

Iti opisyal a waragawag ti PMA babaen kenni public information officer Major Cherryl Tindog, nailanad a naduktalan ti panagpositibo iti virus dagiti nasao a kadete ken personnel ti akademya babaen iti naisayangkat sadiay a mass RT-PCR testing para iti COVID-19 kas paset ti expanded testing effort ti lokal a gobyerno ti Baguio City ken ti IATF.

Nupay nairikep ti akademya iti publiko ken nakanselar dagiti contact activities dagiti kadete manipud nangrugi ti pandemya, kinuna ti PMA nga adda ti posibilidad a nakastrek ti virus iti bubble ti akademya gapu iti innaldaw nga aktibidad ti entero a komunidad.

Kinuna ni Maj. Tindog a naireport ken naikoordinar met dagiti kaso iti health officials ti Baguio ken iti agdama ket maipaspasidong iti panag-agas dagiti pasyente bayat a nalpasen ti contact tracing ken manarimaan ti isolation dagiti nakapulapol dagiti nagpositibo a kadete ken personnel ti PMA.

Kinunana a naisayangkat metten ti disinfection kadagiti apektado a disso isut gapuna a nakontrolen ti virus iti uneg ti akademya.

-- ADVERTISEMENT --

Pagyamyamanan met ti PMA a bin-ig nga asymptomatic wenno awanan ti sintomas dagiti pasyente sadiay ken sumagmamanon kadagiti kadete a nagpositibo iti COVID-19 ti naimbagan.

Ipaspasigurado pay ti PMA kadagiti nagannak ken pamilya dagiti kadete a tuttutukan ti headquarters-da amin dagiti pagkasapulan ken salun-at dagiti kadete.

Maibasar iti rekord ti Baguio City Health Services Office idi December 31 ken January 1, pakabuklan a 37 nga indibidual ti nagpositibo iti COVID-19 sadiay Fort Del Pilar a pakasarakan ti PMA ken kaaduan kadagitoy ket agtawen ti 19-24.