BAGUIO CITY – Agtultuloy ti panangisayangkat ti Philippine Statistics Authority (PSA-Benguet) iti panagparehistro kadagiti umili para iti Philippine Identification System wenno national ID iti baet ti karit iti signal kadagiti maar-aramat a gadgets.

Sigun kenni Imelda Buyuccan, Chief Statistical Specialist ti PSA-Benguet, karit kadakuada ti kinakapoy ti signal bayat ti panagparehistroda iti national ID kadagiti nasusulinek a babbarangay iti probinsia, pakairamanan dagiti babbarangay nga adda iti lockdown.

-- Advertisement --

Imbinglayna a kadawyan a bumayag ti panagparehistro para iti Step 2 wenno ti panagkolektarda ti biometric information dagiti umili no narigat ti signal iti lugar a nagturonganda nga agresresulta iti atiddog a pila dagitoy.

Nupay kasta, dinakamatna a mangitudtudingda ti schedule kadagiti registration centers nangruna ta 60 laeng ti kapasidad wenno bilang a mabalin nga akomodaren dagiti registration kits iti innaldaw.

Innayonna a mapaspasaranda metlaeng ti killaat a panag-offline ti maar-aramat a kagawaan.

Iti baet dagitoy, impanamnama ni Buyuccan nga ad-adalendan dagiti timmaud a pakaseknan ken ar-aramidenda ti amin a kabaelanda tapnu agbalin a napartak ti panagparehistro dagiti umili para iti national ID.