BAGUIO CITY – Tuttutukan ita dagiti barangay officials ti Baguio ti panag-allukoy kadagiti umili iti masakupanda para iti panagparehistro dagitoy iti manarimaan a panagbakuna kontra iti COVID-19.

Iti panakiuman ti Bombo Radyo Baguio, kinuna ni Councilor Micheal Lawana, presidente ti Association of Barangay Captains ti Baguio a no awan ti internet wenno saan nga ammo dagiti umili ti agrehistro iti bakuna.baguio.gov.ph ket nakasagana dagitoy a tumulong.

-- Advertisement --

Kinunana a nasken laeng nga agturong dagiti maseknan iti barangay hall dagitoy gaputa amin a barangay officials ket nabilin a mangakomodar kadagiti kayatda ti agparehistro para iti COVID-19 vaccine.

Imbilinna met ti dagus a panagreport kenkuana dagiti umili a saan a maasikaso no agturong iti barangayda wenno dagiti nakarikep a barangay hall tapnu maipaayan iti kaskenan nga aksion.

Kabayatanna, aw-awisen ti lokal a gobyerno ti Baguio dagiti umili iti siudad nga adda iti A4 Category wenno dagiti essential workers ken dagiti A5 Category wenno dagiti nakukurapay nga umili tapnu ag-rehistron dagitoy.

Naiyunay-unay met ti pagkasapulan para iti panangikabil iti umno a contact number tapnu makaawat iti text message seknan iti aldaw ken lugar iti pagpabakunaan.

Naamuan a dagiti met nakarehistron iti Baguio in My Pocket ket otomatiko a nainayon iti COVID-19 Vaccination Masterlist, pakairamanan dagiti nakipaset kadagiti masterlisting activities iti barangay a pagnanaedan dagitoy.