BAGUIO CITY – Balido dagiti rason dagiti sumagmamano a padi nga opisyal ti Saint Louis University (SLU) iti panaglabsing dagitoy iti COVID-19 vaccine priority rule.

Iti eksklusibo nga interview ti Bombo Radyo Baguio, kinuna ni Mayor Benjamin Magalong a nabasanan ti pammalawag dagiti nasao a padi ken nakitana nga adda ti balido a rason dagitoy iti nasao a panaglabsing.

-- Advertisement --

Kinunana a ti SLU Sacred Heart Hospital ket konektado iti SLU isut gapuna a kanayon met ti panagsarungkar dagiti papadi kadagiti pasyente sadiay tapnu mangipaay iti spiritual support.

Dinakamatna a gapu iti daytoy ket maibilang dagiti papadi kas health workers nga exposed kadagiti pasyente.

(ni Baguio City Mayor Benjamin Magalong)

Gapu iti daytoy, inwaragawag ni Mayor Magalong a narisuten ti isyu nangruna ta addan iti legal office ti pammalawag dagiti maseknan.

Immunan nga imbilinna ti panakaimbestigar ti panagpabakuna kontra iti COVID-19 ti sumagmamano nga opisyal ti SLU, pakairamanan ti presidente ti unibersidad iti baet a saan a karaman dagitoy iti priority list dagiti nasken a maipangruna a mabakunaan.

Naamuan nga inaklon ti parish priest ti unibersidad nga idi March 9 ket nabakunaan daytoy iti first dose ti bakuna nga inaramid ti Sinovac.