BAGUIO CITY – Temporaryo laeng ti panaglako ti maysa a vendor iti mobile truck a naikabil iti deppaar ti biking area ti Burnham Park.

Pammalawag daytoy ni Atty. Rhenan Diwas, dadaulo ti City Environment and Parks Management Office (CEPMO) kalpasan a nakadanun iti opisinada ti adu a sayangguseng seknan iti panagtalinaed ken panaglako ti nasao a mobile truck iti nasao a parke.

-- Advertisement --

Impettengna a dimmalan iti umno a proseso ti panaglako ti nasao a vendor sadiay ken naipaayan daytoy iti temporary business permit nga agpaut iti tallo a bulan.

Naamuan a nagkiddaw ti maseknan a vendor iti pammalubos para iti panaglakoda sadiay Sunshine Park gapu iti umad-ado a kaso ti COVID-19 iti sigud a pwesto dagitoy iti maysa a Business Process Outsourcing ditoy siudad.

Inlawlawagna a ti panangipalubosda iti nasao a kiddaw ket tapno metlaeng maobserbaranda no napintas ti pagbanaganna kas maitunos iti isaksakadda a panakaibangon dagiti pwesto sadiay Burnham Park a paglakuan dagiti vendors sadiay.

(ni Atty. Rhenan Diwas, dadaulo ti City Environment and Parks Management Office)

Kabayatanna, inaklon met ni City Planning Development Officer Architect Donna Tabangin a dagitoy ti nangirekomendar para iti panakaipadas ti panaglako ti nasao a mobile truck tapno makita ti agbalin a resulta ti maisingsingasing a panakaikabil dagiti stalls sadiay.