BAGUIO CITY – Manarimaan ti panagbiruk dagiti babbarangay ti Baguio iti pasilidad wenno lugar iti masakupanda a maaramat wenno agserbi a barangay isolation center.

Iti panakiuman ti Bombo Radyo Baguio, kinuna ni Councilor Micheal Lawana, chairman ti Committee on Barangay Affairs iti lokal a konseho nga adda ti resolusyonda para iti panagbiruk dagiti amin a 128 a barangay ti Baguio iti agserbi wenno maaramid a barangay isolation center.

-- Advertisement --

Impannakkelna nga ita ket dua paylaeng a barangay iti siudad ti addaanen ti barangay isolation center nga inaprobaran ti Department of Health ken dagitoy ket ti barangay Gibraltar ken Greenwater.

Inlawlawagna a napateg ti kaadda ti bukodda a barangay isolation center gaputa panawenen tapnu dagiti makapkaptan ti COVID-19 ngem addaan laeng ti mild case wenno asymptomatic ket maiturong ken agtalinaed iti nasao a pasilidad tapnu saan a mapunno dagiti ospital ken isolation centers ti siudad.

Innayonna a maiyasideg pay dagiti pasyente kadagiti pamilyada ken maliklikan ti kanayon a panagbiahe dagitoy bayat ti panagsarungkarda iti naka-isolate a kabagianda.

Sigun pay kenni Councilor Lawana, iti kanito nga adda ti mabirukan ti barangay nga agserbi a barangay isolation center ket aramatenda ti 20% development fund ti barangay tapnu maipasigurado a kompleto ti pasilidad ti center a maitunos iti ikalkalikagum ti Departmenf of Health.