-- ADVERTISEMENT --

BAGUIO CITY – Ibalbalakad manen ti Police Regional Office – Cordillera (PROCOR) ti panagbalin a nasirib dagiti agtutubo manipud kadagiti awis dagiti makakannigid a grupo kasaruno ti panagsuko iti gobyerno dagiti tallo a kameng ti rebelde a New People’s Army (NPA) a narekrut ti grupo idi agtutubo paylaeng dagitoy.

Impetteng ni PROCOR Regional Director PBGen. R’Win Pagkalinawan a nasken a saan a makikappeng dagiti agtutubo iti rebelde a grupo.

Inyunay-unayna a kakaasinto dagiti nagannak dagiti agtutubo a makikappeng iti NPA ken madadael laeng ti narimat a masakbayan dagitoy.

Inlawlawagna a pursigido dagiti otoridad a mangipila iti kaso nga illegal trafficking kontra iti NPA gapu iti panagrekrut dagitoy kadagiti menor de edad nga agtutubo ken iti kaso a panaglabsing iti humanitarian international laws.

Impetteng ni Pagkalinawan nga aramatenda ti testimonya dagiti simmuko a rebelde tapnu sumardeng ti pananggundaway ken panangallilaw ti NPA kadagiti agtutubo.

-- ADVERTISEMENT --

Malaksid iti daytoy, binalakadanna dagiti manursuro iti maysa nga unibersidad ditoy Baguio City iti saanda a panangited iti nangato a grado kadagiti estudyante nga addaan koneksion kadagiti mangtubtubngar iti gobyerno.

Kinunana a daytoy ti pagbasbasaran dagiti rebelde tapnu maamuan no asino kadagiti estudyante ti addaan ti potensyal nga agbalin a political officer ti NPA. (report ni Bombo Razced Pagoli)