BAGUIO CITY – Iyaw-awis ti City Social Welfare and Development Office (CSWDO) ti panagnumar dagiti kwalipikado nga estudyante ti siudad iti scholarship program nga ididiaya ti opisinada para kadagiti sumrek iti kolehiyo.

Sigun kenni Betty Fangasan, dadaulo ti CSWDO, iti nasao nga scholarship program ket makaawat dagiti benipisaryo nga estudyante iti P5,000 tunggal semestre.

-- Advertisement --

Dinakamatna a nailatanganda iti pondo para iti nasao a programa a puntirya a pagnumaran ti 800 a maikari nga estudyante.

Nupay kasta, kinunana nga iti agdama ket dumanon laeng iti 556 dagiti nagnumar iti nasao nga scholarship program bayat a manarimaan ti panangrepasoda iti aplikasyon dagiti dadduma pay nga estudyante.

Kagiddan iti daytoy, al-allukuyenna dagiti estudyante a katurturposna iti sekondarya ken sumrek iti kolehio tapnu agaplikarda iti nasao nga scholarship program ti CSWDO.

Dinakamat ni Fangasan a kasapulan laeng a makiuman dagiti interesado nga estudyante kadagiti social workers kadagiti opisina ti CSWDO sadiay Pacdal, City Camp, Asin Road, Bakakeng, Irisan, Aurora Hill ken Apugan-Loakan wenno saan ket personal nga agturongda iti main office dagitoy.