BAGUIO CITY- Inikkat ti Kalinga State University (KSU) – Bulanao Campus sadiay Tabuk City manipud iti library daytoy dagiti libro ken dadduma pay a babasaen nga indonar ti National Democratic Front of the Philippines (NDFP).

Iti waragawag ti unibersidad, babaen iti nasao nga addang ket masalwadanda dagiti estudyanteda ken ti institusyon manipud iti infiltration dagiti komunista.

Impaimada ti agarup 11 a libro ken dadduma a babasaen iti militar ken pulisya.

Linawlawagan ti opisyal ti unibersidad a dagiti nasao a libro ken babasaen ket naipan laeng iti library dagitoy ken saanda a kiniddaw manipud iti NDFP.

Nailanad pay iti website ti unibersidad a ti addangda ket mangipakpakita a tubtubngarenda dagiti ideyolohiya ti NDFP ken kayatda a salwadan dagiti estudyante manipud iti panangawat dagitoy iti sursuro ti grupo.

Dinayaw met ti militar ti nagbalin nga addang ti KSU ken kinunada a babaen iti daytoy ket ad-adu pay nga estudyante ken agtutubo sadiay Kalinga ti mailiklik manipud iti ima ti Communist Party of the Philippines-New People’s Army.

-- Advertisement --