BAGUIO CITY – Nagbalin nga emosyonal dagiti pamilya dagiti 14 elite troopers ti Cordillera a nairaman iti naawagan a SAF44 kagiddan ti panakalagip ti maikalima a tawen nga anibersaryo ti Mamasapano Massacre ita nga aldaw, January 25.

Nupay kasta, impeksa ni Mrs. Edna Tabdi, ina daydi PMajor Gednat Tabdi a napakawandan dagiti responsable iti napasamak a masaker.

Maipalagip a ni PMaj. Tabdi ti nangidaulo iti 84th Special Action Company ti PNP-SAF a nangisayangkat iti Oplan Exodus sadiay Mamapasano, Maguindanao a nangparmekanda iti international most wanted bomb maker a ni Marwan.

-- Advertisement --

Kinuna ni Mrs. Tabdi nga impabiangdan iti Diyos ti panakaragpat ti hustisya para kadagiti annakda a SAF troopers gaputa awan ti maaramidanda nangruna ta nabibileg dagiti kalabanda.

Kinunana a ti Namarsua laengen ti mangited iti pannusa kadagiti responsable iti napasamak a masaker.

Nupay ti napasamak ket paset ti risgo iti trabaho dagiti annakda, impettengna nga adda ti napasamak a panagbaybay-an iti benneg dagiti adda iti maseknan a posisyon.

– timek ni Mrs. Edna Tabdi

Innayon ni Mrs. Tabdi a nakasaganada a tumulong no adda ti maipila a baro a kaso kontra kadagiti high-ranking officials gapu iti Mamasapano Massacre tapnu maragpat ti aniaman a hustisya a mabalin pay a maipaay iti SAF44.

Kabayatanna, ginuyugoy met ni DILG Assistant Secretary Manuel Felix dagiti agtutubo tapnu pagbalinenda a karit ti kinabanuar ti SAF44 ken tapnu pagbalinenda a modelo dagiti naawagan a Tagaligtas.

– timek ni DILG Assistant Secretary Manuel Felix

Innayonna a ti panagwaywayas ken natalna a panagbiag ita iti pagilian ket sinibugan ken agtultuloy a sibsibugan ti ling-et, dara ken luwa dagiti panakabagi ti linteg a rumbeng a subadan iti kinaimbag.